კინო კლუბის გახსნა ანუ სად გაქრნენ ვეტერანი მელომანები?

როგორც წინა პოსტში ავღნიშნე დღეს ახალი კინო კლუბის გახსნას დავესწარი. ეჭვი მაქვს, რომ ფოტოგამოფენისთვის და კინოების ჩვენებისთვის, რომელიც ლაივის მერე იყო დაგეგმილი, სულ თითზე ჩამოსათვლელი ადამიანი მივიდა (აქ იგულისხმებიან თვითონ გამოფენის ავტორი და ორგანიზატორები). ადგილი კარგია, ადვილად მისაგნები, ვაჟაზე, მეტროსთან. ეს ყველაფერი კარგი, მაგრამ რატომ არ ვიცოდი რომ კ ა ნცერტი გარეთ იყო, ღია ცის ქვეშ? სასიამოვნო მოულოდნელობა კი იყო, მაგრამ სავსებით სავარაუდოა რომ სულაც არ მქონოდა სურვილი დახურულ დარბაზში მისვლის, ისედაც სუნთქვა შეუძლებელია უკვე.

ეგ კარგი, ისიც კარგი რომ კონცერტი დაგვიანებით დაიწყო.. ალბათ ხალხის შეგროვებას ელოდნენ, ქართველი მსმენელი კი ტრადიციას არ ღალატობს და ღონისძიებაზე რამდენიმე წუთით კი არა ნახევარი, ან სულაც ერთი საათით აგვიანებს, ალბათ ამით აიხსნება რომ ყველაზე მეტი ხალხი მაშინ შეიკრიბა, როდესაც LOUDspeakers, ანუ პირველი ჯგუფი უკვე ამთავრებდა გამოსვლას და ZurGi-ს უთმობდა ადგილს.

ხალხს რაც შეეხება..რა ვთქვა..არა, ჯობს არაფერი ვთქვა და ვიმსჯელო იმ მოსაზრებიდან გამომდინარე, რომ მეც ვიყავი პატარა, მეც ვიყავი დამწყები "როკისტი" მაშინ როცა ჩემზე ბევრად დიდი და "ვეტერანი" ხალხი დადიოდა კონცერტებზე და ალბათ ისინიც თვლიდნენ რომ ბევრი არაფერი გამეგებოდა მუსიკაში, მაგრამ აი პიკი იყო, როდესაც ერთ-ერთმა გოგონა ჩამოჯდა და მეგობართან ერთად წიგნის კითხვა დაიწყო..კინაღამ შევძახე: "ეი, გოგონი, აქ ვართ", მაგრამ რად გინდა, ყველას თავისი ინტერესი აქვს როგორც ჩანს..ერთი კითხვა მაინც რჩება: სად არიან მოზრდილი მსმენელები? ძალიან დიდი ხანია ბავშვების მეტი არავინ დადის კონცერტებზე, არა კი კარგია, რომ აინტერესებთ და სიმღერების ტექსტებიც დაუზეპირებიათ, ხტუნვაც უყვართ და თავის ქნევაც, მაგრამ ჩემთვის ასეთ აუდიტორიაში ყოფნა არასაინტერესოა, რომ არაფერი ვთქვა იმაზე, რომ ვწუხდები. საინტერესოა, რომ შემთხვევის ადგილზე რამდენიმე მეტალისტი მოძრაობდა "Slayer"-ის მაისურით, ნეტა ეს მეტალის ახალი პროპაგანდაა თუ რამე ყურადსაღები გამომრჩა? ხუ ნოუზ..

გაგანია კონცერტში ჟურნალისტი მომადგა მიკროფონით, დიდად კი ვეცადე თავი ამერიდებინა, მაგრამ აღმოჩნდა რომ ჟურნალისტიც და ოპერატორიც ჩემი ძველი, კარგი ნაცნობები აღმოჩნდნენ და ფაქტიურად "დამაძალეს" კომენტარის ჩაწერა..არადა როგორ არ მიყვარს კამერა..მძაგს! ესეიგი აწი "ტელეზვიზდებს" კიდევ ერთი ადამიანი შეემატება ჩემი სახით, მე კი რასაკვირველია სიუჟეტიდან ჩემს სახეს, სახელ-გვარითურთ დავა"სქრინშოთებ" და სოციალურ ქსელებში გამოვდებ იმიტომ რომ რავიცი, ასე შვებიან ხოლმე ადამიანები "გატელევიზორების" შემდგომ..

LOUDspeakers-ის გამოსვლა მართლაც კარგი იყო, ჟღერადობაც უწყობდათ ხელს და "დუხიც" იგრძნობოდა. შემდეგ უკვე ZurGi-ს ჯერი დადგა, რომელზეც აღარ დავრჩი იმიტომ, რომ მუსიკის სათანადო დოზა მიღებული მქონდა და ქუჩაში სეირნობა ვარჩიე. მითუმეტეს რომ ფოტოგამოფენა და კინოების ჩვენება მხოლოდ "მიწვეული სტუმრებისთვის" იყო და არა ჩვეულებრივი მოკვდავებისთვის.

თბილისში ის ხდებოდა, რომ ნებისმიერ ფაბში, კაფეში თუ სახინკლეში (ეს უკანასკნელი განსაკუთრებით) ეკრანზე ფეხბურთს აჩვენებდნენ, არაა ხომ გასაკვირი? 

ფოტოები იტვირთება და სუულ ცოტა ხანში დაიდება.