(0)6(0)9 - Good Thursday in Tbilisi and Batumi

06.09.

ნოლები მოვაშოროთ.

რა დარჩა?

კარგი, ეს იქით იყოს და ხუთშაბათის პირობაზე საკმაოდ დატვირთული საღამო იქნება თბილისში დღეს და არა მარტო თბილისში, ბათუმშიც.

დიოგენეს კინოკლუბის ჩვენებებს წინა სეზონზეც განვიხილავდი და არც ახლა გამოვტოვებ. დღეს 8 საათზე არა მხოლოდ ერთ, ან ორ, არამედ მთელ "12 განრისხებულ მამაკაცს" იხილავთ. ეს უკვე კლასიკად ქცეული კინო სიდნი ლუმიტმა გადაიღო და მე მგონი ნანახი თუ არა ყურმოკრული მაინც აქვს ყველა კინომოყვარულს. ასე რომ მიხვალთ სპორტის სასახლის უკან, აფაქიძის ქუჩაზე, გადაიხდით 3 ლარს, ამ ფასში აიღებთ რაიმე სასმელს პირი რომ არ გაგიშრეთ და თან კინოსაც უყურებთ. მშვენიერია არა?

8 საათიდან კლუბ Safeშიც შეგიძლიათ შეიაროთ, თუმცა ივენთი 11 საათზე დაიწყება და დილამდე გაგრძელდება როგორც ჩანს. პოსტერიდან გამომდინარე გლამურ ფართი იგეგმება, დაუკრავენ Eke და Fa moUs. ეს უკანასკნელი რას წარმოადგენს არ ვიცი, ან რა საჭიროა ეს განცალკევებული დამწერლობა, Uს გამოყოფა.. რას არ მოიფიქრებს ხალხი ყურადღების მისაქცევად. ერთადერთი რაც მომეწონა იყო ივენთის "კედელზე" დადებული Magicianის ტრეკის ლინკი და თუ მართლა დაუკრავენ "კარგებს და ჩქარებს", აუცილებლად მივალ.

გადავინაცვლოთ "დივანში", სადაც 7 საათიდან ალექსეი ცვეტკოვი და მისით დაინტერესებული საზოგადოება შეიკრიბებიან. სიმართლე გითხრათ, დიდად არ ვიცოდი ამ პიროვნების ვინაობა აქამდე, მაგრამ საკმაოდ პროგრესულ პოეტად წარმომიდგენია, ვინაიდან ევროპულ რადიო თავისუფლებაში მუშაობდა და სავარაუდოდ აზრების ნაკლებობას არ უჩივის. საინტერესო იქნებოდა მისი ნაწარმოებების მოსმენა.

უკვე 11 საათიდან ამავე ლოკაციაზე რეივი დაიწყება იმიტომ რომ Acid Victim და Telewatt დადგებიან მიქშერთან. რაც საუნდქლაუდზე მოვისმინე, საკმაოდ კარგი რემიქსებია, დაბსტეპი ჭარბობს, შიგადაშიგ ელექტროს ჩანართებით. აი ყველამ რომ დიჯეობა დაიწყო ეს უკვე სხვა საკითხია, მაგრამ ამას აღარ განვავრცობ.

კაფე-გალერეაც ერთ-ერთ ოპციად რჩება, ჭარბი ტექნო, შანშიკა და ნიკალაი, ერთი და იგივე ხალხი, ერთი და იგივე გარემო, ბევრი ბარმენი გოგონები და ბიჭგოგოები.

ბათუმი და თბილისი რამ გაყო, სამასრაღაცა კილომეტრმა, ასე რომ ვინც იქ ხართ ან მიემართებით, 9 სექტემბრამდე შეგიძლიათ არტ ფესტივალსაც დაესწროთ, რომელზეც არა მარტო ქართულ კულტურას გაეცნობით უფრო საფუძვლიანად, არამედ ესპანურსაც.

6 საათიდან კი Cocoa Beach ზე დიდი ივენთი იქნება, მოიყრიან თავს ძირითადად ლოკალ დიჯეები და სავარაუდოდ ადგილობრივი მოსახლეობაც იმიტომ, რომ მგონი ბათუმში დამსვენებლების რაოდენობამ კატასტროფულად იკლო, სამაგიეროდ პირდაპირპროპორციულად გაიზარდა მზიანი საათების რაოდენობა, რაც აგვისტოში ჩასულთ გულზე მწარედ გვხვდება, მაგრამ რას ვიზამთ, არ გვჯერა ამ "ბარხატნი" სეზონის და ჩვენი ბრალია, ჩვენი.

Well, let me point out the main gatherings in Tbilisi and also Batumi this evening.

I mentioned one film screening in a cinema club, however I do not think this will be interesting for you, because most probably the movie will be dubbed in Russian language.

On the other hand, you can visit club SAFE starting from 8 p.m. This is in old Tbilisi, Shardeni Street, the big  iron locker door will most definitely attract your attention. The glamour party starts at 11 p.m. with DJ Eke and Fa moUs playing some mixes.

"Divani" on Tabidze Street will welcome a Russian poet Aleksei Tsvetkov at 7 p.m., who has been working in Radio Liberty in Europe and seems to be a very progressive person. Still, if you do not know Russian, there is no point attending this meeting. Nevertheless, if you go there at 11 p.m., you will already find yourself on dubstep event with Georgian young DJs - Telewatt and Acid Victim playing their set. 

Regarding Batumi, an Art festival takes off today and will last until September 9. This will give you the opportunity to discover not only Georgian, but also Spanish culture. You will find exhibitions, musical performances and many more.

Also, today, at 6 p.m. there is a big DJ event on Cocoa Beach (near hotel Marina). I can not say that a lot of people will gather there, because most holiday-makers have already arrived to Tbilisi and their other hometowns, but the music will definitely be waiting for you there.

Cheers!

არა-დაკოპირებული პოსტი ანუ მორიგი პარასკევი თბილისში

დადგა უიქენდის დრო. სიმართლე რომ ვთქვა, რაც დრო გადის, მით უფრო მგონია რომ წინა კვირების პოსტების დაკოპირებაც კი შემიძლია, იმიტომ რომ არაფერი ახალი არ ხდება. იტყვით ალბათ, ხომ იცოდი სადაც ცხოვრობ, რა გინდოდა მაშინ, ეს ბლოგი რატომ წამოიწყეო, მაგრამ ხომ იცით, ადამიანი იმედით ცხოვრობს, იმედი კი ისეთი ოხერია რომ ბევრ რამეს გაგაკეთებინებს.

დღევანდელი საღამოს მიმოხილვას ყველაზე მასშტაბური ივენთით დავიწყებ, რომელიც გლდანში, კვლავ თეთრ ტბაზეა დაგეგმილი. მე მგონი ადამიანებმა არ იციან ზუსტად სიტყვა "ფესტივალის" მნიშვნელობა იმიტომ რომ ბოლო დროს რაც კი რამე გაკეთდა, თითქმის ყველაფერს ფესტივალს არქმევენ, არადა დარწმუნებული ვარ რომ არ შეიძლება ამდენი "ფესტივალი" აკეთონ ყოველწლიურად. ამ ჯერზე ეს არის Living the Dream ფართი, რომელიც 24 საათის განმავლობაში ნონ-სტოპ უნდა ჩატარდეს და წესით უკვე შუადღის თორმეტ საათზე უნდა აეღო სტარტი. ლაინ-აფს რაც შეეხება, დიდად შთამბეჭდავი არ მომეჩვენა მიუხედავად იმისა, რომ საკმაოდ ჩამოგრძელებულია. დაუკრავენ Misha G, Mixline, Soul DeeJays, Dimitri Funky და კიდევ ბევრი არაფრისმთქმელი სახელები (რა ვქნა, არ ვარ მათ სამეგობროში და არ ვიცნობ).

შემდეგ უკვე ნატახტარის ექსტრემალური ფართი იმსახურებს განხილვას. თუ იცით სად არის ნატახტარის აეროდრომი (ჩემგან განსხვავებით) და თან თუ ბაიკერი ან ოფროუდერი ხართ, ეს ივენთი ალბათ განსაკუთრებით მოგეწონებათ. მე პირადად უფასო ლუდის იდეაც მომეწონა, მაგრამ სამწუხაროდ არაა დაკონკრეტებული, რა ტიპის მუსიკა იქნება, ლაივი თუ ლეპტოპური, რაც საკმაოდ მნიშვნელოვანია.

პარასკევი საქველმოქმედო საღამოს გარეშეც არ ჩაივლის, ასე რომ ვისაც 5 ლარი არ ენანება, წაბრძანდით "მაგთი კლუბში" 9 საათზე. აქ გაიმართება ახალი ფონდის პრეზენტაცია, რომელიც მიუსაფარ ადამიანთა დახმარებას ისახავს მიზნად და იმისთვის, რომ ხალხი მიიზიდონ ამ ერთი შეხედვით მოსაწყენ ღონისძიებაზე, დიჯეიც კი დაუკრავს, სპეც-სტუმრები კი ელენე კალანდაძე (ყოფილი ვარსკვლავების აკადემიელი) და ნოდარიკო ხუციშვილი იქნებიან.

"დივანში" საღამო ისევ ორ ნაწილად გაიყოფა. 8 საათიდან ერთგვარი პეჩაკუჩა (PechaKucha) ივენთია დაგეგმილი, რაც როგორც მივხვდი აერთიანებს კრეატიულ ხალხს, ისინი ერთმანეთს უზიარებენ გამოცდილებას და ნამუშევრებს და წესით საკმაოდ საინტერესოდ უნდა ჩაიაროს. ამის შემდეგ უკვე Solar Eclipse-ის ჯერი დგება 11 საათიდან. ეს ჯგუფი (ჯგუფი გამხდარა, ადრე როგორც მახსოვს ერთი ადამიანი უკრავდა) Forestის შვილობილია და ვერ ვიტყვი რომ ან ისეთივე პოპულარულია ან ისევე მოსაწონი, როგორც წინამორბედი, მაგრამ ალბათ ბევრ გადაღეჭილ "მიქშერისტებს" სჯობს.

DJ გიგი ჩიჩუა, რომელიც მახსოვს Mezzoს სახე იყო, ამჯერად მისონში გადაბარგებულა და დღეს 11 საათიდან დაუკრავს, თუმცა თუ სოციალურ ქსელში ამ ივენთის "პოპულარობას" გავითვალისწინებთ, დიჯეი ალბათ მისონის მომსახურე პერსონალს თუ აიყოლიებს მხოლოდ.

კაფე-გალერეაში დღეს კობერტი და ბაჩო ჩალაძე უკრავენ. საკმაოდ კარგი ტანდემია (თუ მეხსიერება არ მღალატობს)

აი ძირითადად ასეთი საღამო ჩაივლის დღეს თბილისში, უიქენდის შესახებ თუ გინდათ ინფო, ოდნავ მოგვიანებით შემოიხედეთ

თბილისში თუ ქუთაისში - პარასკევს ყველგან რაღაც ხდება

და აი მორიგი პარასკევიც ახლოვდება, ახლოვდება რა, სულ მალე გაპარასკევდება და სადაც წინა თარსი გადავიტანეთ, ხვალ ალბათ ყველაფერი უკეთ ჩაივლის.

პოეზიის დიდ მოყვარულებს 7 საათიდან შეუძლიათ "დიოგენეს" წიგნის მაღაზიაში შეიარონ სადაც მედეა იმერლიშვილის ლექსების კრებულის პრეზენტაცია იქნება. მართლია, ვეცადე ინტერნეტში მომეძებნა მისი რამდენიმე ნამუშევარი მაინც, სამწუხაროდ ამაოდ, არცერთი სრული ვერსია არ ამომიგდო ძიების საიტებმა, მხოლოდ რამდენიმე სათაურით დაკმაყოფილება მომიწია. ასე რომ, სამწუხაროდ ვერ გამოვთქვამ ჩემს პირად და მიკერძოებულ მოსაზრებას მის შესახებ.

ვინც თბილისში ყოფნას ხვალ არ აპირებთ, 6 საათისთვის ქუთაისში უნდა ჩახვიდეთ რომ ოქროს ჩარდახში როკ კონცერტს დაესწროთ. კონცერტის სახელია "როკი და დემოკრატია", საკმაოდ გამბედავად ჟღერს არა? რაღაც ძველი ანარქისტების სუნიც მცემს, ლაინ-აფის დანახვაც გულს ახარებს, ძველი სახელები, რომლებიც საკმაოდ დიდი ხანია არ გამოჩენილან არსად - ლაბირინთი, Crossroad, GREEN MAMA, ასევე რობი კუხიანიძე და ბაკურ ბურდული (რომელიც საერთოდ ამოვარდნილია ამ ჩამონათვალიდან, მაგრამ ფაქტია რომ კონცერტში მონაწილეობას იღებს). კონცერტს კონცეპტუალური ხასიათი აქვს იმიტომ რომ დემოკრატიის სკოლების პიარს აკეთებს.

გადმოვინაცვლოთ ისევ თბილისში, სადაც "დივანი" 11 საათიდან Greenbeam & Leonს უთმობს ასპარეზს, შესაბამისად მათ პროექტს - Autumn Tree. პირველ რიგში იმიტომ ვაფასებ ამ ადამიანებს, რომ კაფე-გალერეას რეზიდენტები არ არიან და ასე ხანდახან რომ გამოჩნდებიან ამა თუ იმ ივენთზე ორმაგად და სამმაგად გვიხარია ხოლმე. 

ამასობაში სენატს ჩამოყავს GIOM, რომელზე მოსახვედრადაც უნდა გადაიხადოთ 20 ლარი. სამაგიეროდ იტყვით შემდეგ რომ უცხოელი დიჯეის დაკრულზე იცეკვეთ და "აუუუ, რა მაგარი იყო" და "რა მაგრად გამიქსააა". ხუმრობა, ხუმრობად, მაგრამ რასაც მოვუსმინე საკმაოდ კარგი ტრეკები აქვს, ალბათ ღირს შეხედვა მაინც.

MEZZOს ივენთები საკმაოდ კარგა ხანია არ მხვდებოდა თვალში ან ისეთი იყო რომ ყურადსაღებად არ ღირდა, სამაგიეროდ ხვალ რეტრო ფართია დაგეგმილი, დიჯეების მხრივ დიდ აღფრთოვანებას ვერ გამოვთქვამ - ნიკალაი, დარქი..არ მსმენია მათზე ადრე და არც ექსპერიმენტების სურვილი გამიჩნდა, აი საქსაფონისტს კი მოუსმენდა ადამიანი. იპოვე დადებითი ნებისმიერ ივენთში (c)მე

და ბოლოს, კაფე-გალერეა, სადაც ხვალ თომას და გიო შენგელიას ჯერია. გოუ ბოიზ!

სად წავიდეთ ხუთშაბათ საღამოს

 გახუთშაბათდა, განწყობა თანდათან გამოკეთდა, წვიმებმა გადაიარა, ჰაერი კვლავ ჩაიხუთა, სუნთქვა ჯერ კიდევ შესაძლებელია, ასე რომ საღამოს შეიძლება დროის გატარება.

თუ პრიორიტეტების მიხედვით დავალაგებ, პირველ ადგილს უდავოდ გრინჩის ივენთი იკავებს კაფე-გალერეაში. მართალია ლოკაცია უკვე აღარ მიზიდავს, მაგრამ სავარაუდოდ მართლა Trippy Night იქნება, გრინჩს კი კარგად შეუძლია ხალხის გახურება.

სასიამოვნოდ გამიხარდა გიო ბებიავას გამოჩენა არენაზე. შარშან საკმაოდ ხშირად უკრავდა, უმეტესწილად იუჯინ რეისთან ერთად სახურავ-ფართიებზე, წელს კი ფაქტიურად არსად შემინიშნავს. აი დღეს ღამე სენატში გიო Dj Vakhato-სთან ერთად დაუკრავს. მოასწარით პირველ საათამდე მოხვდეთ ვაკის პარკის ტერიტორიაზე თორემ შემდეგ უკვე 20 ლარის გადახდა მოგიწევთ. ისე, ყოველთვის არ მასვენებდა კითხვა, რატომ არის ასეთი ვითომდა ძალიან "ფეშნ" კლუბები უმეტესწილად ცარიელი და კაფე-გალერეასმაგვარი ადგილები გადატენილი, თქვენ გაქვთ თქვენი ვერსია? თუ დაწერთ, ჩემ ვერსიასაც შემდეგ გავამხელ.

აქვე კიდევ ერთხელ აღვნიშნავ რომ კანუდოსში ყოველ ხუთშაბათს იმართება ლაივი, უკრავს ბენდი, არის შედარებით წყნარი სიტუაცია და ლუდის მოსაწრუპად მშვენიერი გარემოა შექმნილი.

და ბოლოს, არ შემიძლია არ აღვნიშნო ის კინო-ჩვენება რომელიც დღეს "დიოგენეს" კინო-კლუბში იგეგმება, კერძოდ "სიკვდილი ვენეციაში", რომლის რეჟისორია ლუკინო ვისკონტი. თუ არ გაქვთ ეს კინო ნანახი და ისიც იცით რომ (ჩემსავით) სახლში ამის მნახველი არ ხართ, 8 საათზე სპორტის სასახლის გზას დაადექით და ნახეთ. მართლაც რომ შთამბეჭდავი კინოა და ისეთი არა მარტო რამდენიმე საათი, არამედ შეიძლება რამდენიმე დღე გაგყვეთ მასზე ფიქრი.

ხვალ, ანუ პარასკევიდან უკვე დიდი მოძრაობა შეინიშნება თბილისში, საღამოს თუ შემოიხედავთ ბლოგზე, შეგიძლიათ უიქენდიც დაგეგმოთ.

შაბათობა ლუდის ფესტივალის და მგონი წვიმის გარეშეც

გამოგიცდიათ ნახევრად მზა პოსტის წაშლის სიმწარე? მე კარგა ხანია არ მქონდა გამოცდილი და მხოლოდ ნახევარი წუთის წინ შემზარა. რა გაეწყობა, მეორე ამოსუნთქვა მეყოფა ალბათ რომ ახლიდან დავიწყო.

ერთი სიტყვით, იმას ვწერდი რომ თუ გუშინდელ პარასკევ-ცამეტს გადაურჩით და ამას კითხულობთ, გილოცავთ! იმედია თქვენ კიდევ ერთი ფობია გადალახეთ.

რაც შეეხება დღევანდელ დღეს, საკმაოდ არაპროგნოზირებადია, ვინაიდან ზოგი თავსხმა წვიმას და ცის დამხობას ელის, ზოგიც ამტკიცებს რომ ყველა წყარო უნამუსოდ იტყუება და მზიანი დღე გველის. ასეა თუ ისე, ლუდის ფესტივალის ორგანიზატორებმა მაინც გადაწყვიტეს თავი დაეზღვიათ და გადაედოთ 2-დღიანი ღონისძიება.

პ.ს.: ეს ის ლუდის ფესტივალია არავის რომ ლუდი არ მოსწონს და ყველა რომ გამომსვლელ ჯგუფებს და მომღერლებს ლანძღავს და მაინც დილიდან-ღამემდე რომ იქ არიან.

სამაგიეროდ, იყალთოს გორაზე ფართი მაინც ჩატარდება, ვინაიდან ამ ივენთის ორგანიზატორები არ შეუშინდნენ ბუნების მოვლენებს. წესით 1 საათზე უკვე უნდა დაწყებულიყო მუსიკა, დამთავრებით კი ხვალ დილის 10 საათზე უნდა დამთავრდეს. კარგი ამ ყველაფერში ის არის რომ ღია ცის ქვეშ კეთდება და თან კარვების ადგილიც ყოფილა (დამაჯერებლად რომ მოვიტყუოთ თავი, ვითომ სულაც არ ვართ თბილისში და ორმაგად გავბედნიერდეთ). სამწუხაროდ, ლაინ-აფი არ არის დიდად მიმზიდველი, კაფე-გალერის რეზიდენტები ხვდებიან ბუდეს და have-never-heard-about-them-beforeებს. და  მაინც, თუ გხიბლავთ ეს იდეა, ახლავე შეგიძლიათ გაეშუროთ დანიშნულების ადგილას.

ვისაც წვიმის იდეაც არ მოსწონს, ღია ცის ქვეშაც არ უნდა და საერთოდ, უფრო "დავარცხნილ" ივენთს ეძებს, 10 ლარის ფასად "დივანში" შეუძლია წასვლა, სადაც 10 საათიდან SvanSikh იმღერებს. ეს ჯგუფი სხვათაშორის საკმაოდ მალე და მოულოდნელად გახდა პოპულარული თინეიჯერებში და ერთ-ერთია იმ ჯგუფებს შორის რომელთა მოსმენის სურვილი არ გამაჩნია, თუმცა თუ სადმე რომელიმე ივენთზე შემთხვევით შემომესმენ, აუცილებლად დავუგდებ ყურს, იქნებ ვცდები.
აქვე ცოტა მოგვიანებით, 12-ის ნახევრიდან უკვე ჟორჟიკა დადგება მიქშერთან (ერთია საკითხავი, ნუთუ "დივანი" კაფე-გალერის ხარჯზე ცდილობს ხალხის მიზიდვას და პოპულარობის გაზრდას, ხუ ნოუზ).

უფრო მიმზიდველად მეჩვენება ივენთი "ვიტამინში" სადაც Catch The Clouds-ის პირველი ლაივ კონცერტი შედგება. სიმართლეს ვიტყვი და ადრე მსმენია მათ შესახებ, თუმცა ტრეკები არ ვიცი და ისედაც, ყოველთვის საინტერესოა დებიუტზე თვალისდევნება, ასე რომ თერთმეტის ნახევრიდან ეჭვი მაქვს საკმაოდ ბევრი პოტენციური მსმენელი შეიკრიბება "მუზაში" (კუს ტბის ასახვევი).

Unique-ის ივენთს რომ შევხედე თავიდან ვიფიქრე ისევ მორიგი უცხოელი ტიპი ჩამოყავდათ (უბრალოდ იმიტომ რომ უცხოელია), მაგრამ ისევდაისევ შემოწმება ვარჩიე თავიდან და შემრჩა ძალიან სასიამოვნო ა-ლა-ოულდ-სქულ ტრეკები რაზეც მშვენივრად შეიძლება კლუბში აქტიურად განძრევა. ვორმ-აფიც არ იქნება ურიგო ვაკო ტ(აბატაძე)სთან ერთად.

ამასობაში კაფე-გალერიში სიხა და ირაკლი შონია დაუკრავენ (როგორც ყოველთვის ამ მომენტში სიტყვაძუნწი ვხდები).

და ბოლოს, ჩემი მოსაზრებით ნაკლებად განსახილველი ივენთები, მაგრამ მე ხომ უნდა ვეცადო რაც შეიძლება ინფორმატიული ვიყო - თბილისის ზღვისკენ ვინც გაეშურებით, იქ ბარი Silver შემოგხვდებათ, ან ხმამაღალ მუსიკას მაინც გაიგებთ და იცოდეთ რომ 8 საათიდან "ბიიჩ" (კიდევ ერთხელ, არა ბიჩ) ფართი იგეგმება გიო გუგენიძის და Soul Deejays თანხლებით.
გუშინ ვახსენე თეთრი ტბა (გლდანში), დღეს უკვე ქასრა, მარგო და ლუი დაუკრავენ და როგორც მითითებულია გახსნიან ზაფხულის სესიებს.

აი ასეთი დატვირთული შაბათი საღამო გველის. წვიმა კი ლუდის ფესტივალის ორგანიზატორების ჯინაზე ჯერ-ჯერობით იგვიანებს.

პარასკევდეკატრიაფობია ხომ არ გაწუხებთ?

პარასკევო ლამაზო, სხვა პარასკევი სად არის..

კი არა, პარასკევდეკატრიაფობია ძალიან გავრცელებული ფობიაა მთელს მსოფლიოში, მაგალითად იქ სადაც მე-12 სართულის შემდეგ პირდაპირ მე-14 სართული მოდის, თავს იტყუებენ და უხარიათ. არიან ისეთი ადამიანებიც ვისთვისაც ეს დღე იღბლიანია (მათ შორის მეც), ამიტომ მოდი სახლიდან-ფეხის-გამდგმელი-არ-ვარ მიდგომა გვერდზე გადავდოთ და დავაფიქსიროთ რა ხდება საღამოს თბილისში.

მათთვის ვისაც ჯერ პოეზიის საღამოზე დასწრება სურს, "დიოგენეს" წიგნის მაღაზიაში შედგება გაგა ნახუცრიშვილის პოეზიის საღამო 7 საათიდან. მისი ლექსები მოვიძიე ინტერნეტში ზოგადი შთაბეჭდილების შესაქმნელად, თუმცა მე მგონი მე და პოეზია სულ უფრო და უფრო ვერ ვუგებთ ერთმანეთს, ანკი თანამედროვე პოეტებმა დაკარგეს პოეზიის აღქმა და რაღაც ურითმობებში გონიათ თავს დაიმკვიდრებენ.

ზედა ღონისძიების ალტერნატივაა კინოს ყურება. კინოები და კინო-კლუბები არ გვაკლდა, ახლა უკვე ოფისებში, ბინებში, მალე აივნებზე მოეწყიბა კინო-ჩვენებები. ამჯერად საქმე მიდგა ენგეო "იდენტობას" ოფისზე, რომელიც რუსთაველზე მდებარეობს და უჩვენებენ ფილმს "უიქენდი". თემატურად კი ბატონო, გასაგებია რატომ აირჩიეთ, მე ერთი იმას ვერ ვხვდები რატომ უნდა გაუჩნდეს ადამიანს სურვილი სადღაც ოფისში რაღაც კინო-ჩვენებაზე მივიდეს პარასკევს 7 საათზე და მერე იმსჯელოს ამავე ფილმზე ვიღაცეებთან ერთად. თვითონ ორგანიზაცია რას ემსახურება ვიცი და მივესალმები, მაგრამ აი ამ კინო-ჩვენებებს რა დატვირთვა აქვს, თუ ვინმე გამარკვევს, დიდად მადლობელი დავრჩები.

გლდანი როგორც ვხვდები მალე თბილისის ცენტრს გაუწევს კონკურენციას, ეს ყველაფერი კი ე.წ. თეთრი ტბის დამსახურებაა, სადაც უკვე ყოველ კვირა ივენთები იმართება. ამჯერად ბიიჩ (და არა ბიჩ) ქლაბ წვეულება მზადდება. თბილისის პირობებში, მითუმეტეს გლდანში რატომ უნდა დაარქვა წვეულებას ეს სახელი არ ვიცი, მაგრამ ფაქტია რომ ყველაზე ნაკლებად იქნება ზღვის ტალღების ხმაური, ქვიშა და ბიკინებიანი გოგოები. სამაგიეროდ დაუკრავენ ქასრა, ვინმე კრისტალი, ოთკა და "სულიერი დიჯეები" (Soul deejays). სულაც არ ახდენს ჩემზე შთაბეჭდილებას ეს ალაინ-აფი და არც რეკომენდაციას ვუწევ, მხოლოდ ტბის სანახავად წასვლაც დიდად არ მინდა, ასე რომ guyz, this is a big no-no 4 2night.

"დრიადა" გახსოვთ? იყო ასეთი ჯგუფი წარსულში და ყავდათ ერთი მო-გოთ-ო ვოკალისტი თეა, შემდეგ თეამ ბევრი იარა თუ ცოტა გააკეთა ცალკე ჯგუფი Lilla Land (იასამნისფრის სიყვარულში). სწორედ ამ ჯგუფის კ'ა'ნცერტი და ალბომის პრეზენტაცია შედგება დღეს "დივანში". მე ამ ჯგუფს ხარისხიან გოთიკად ვთვლი და შესაბამისად ალბათ ამ ჟანრის ბევრი მოყვარული მოიყრის თავს ივენთზე. ერთი კარგი ნიუსი კიდევ ისაა რომ თურმე ვინც ბარში 10 ლარს მაინც დახარჯავს, ახალ ალბომს საჩუქრად მიიღებს! ვი-ვა ალკაში!

თუ "დივანში" შემორჩებით, 11 საათიდან უკვე დაბსტეპ/დრამ ენ ბეისი ფართი დაიწყება Acid Victim & Telewatt-თან ერთად და რახან ისიც ვიცი ამ სახელების მიღმა ვინ იმალება, საკმაოდ გემოვნებიანი ივენთი უნდა გამოვიდეს.

ამასობაში კაფე-გალერეაში ბერო/ბაჩოს ტანდემი იდგება მიქშერთან.

თუ არცერთი ზემოთხსენებული არ გაკმაყოფილებთ, გაიარეთ Mezzoში, StudioTbilisi Chardinში ან თუნდაც Book Corner Cafeში სადაც "რაღაცეებს" ახდენენ, თუმცა ამაზე დაწვრილებით დაწერა უკვე ზედმეტი იქნება, დიდად საინტერესო არაფერია, დამიჯერეთ. თუ მაინც გაიარეთ და მოგეწონათ, გთხოვთ რეკომენდაცია ქვემოთ, კომენტარებში დააფიქსიროთ.

პარასკევ13საღამომშვიდობის

სულაც არაა აუცილებელი უიქენდის ლოდინი, თურმე

გუშინ მე მგონი პირველად გავერთე "პარასკევულად" შუა კვირაში. Fეისბუქის ფეიჯზე კი დავწერე რომ კანუდოსში ლაივი იქნებოდა 9 საათიდან, შესაბამისად მეც წავედი, დავზვერე სიტუაცია და მინდა ვთქვა რომ სასიამოვნოდ გაოცებული დავრჩი იმით რომ სიტუაცია და მუსიკა ერთმანეთს შეესაბამებოდა და მართლაც კარგი იყო. და მაინც, იმისთვის რომ 100%-ით გაერთო, აუცილებელ პირობად რჩება ცოტაოდენი ალკოჰოლის მიღება (ცოტაოდენზე ცოტა მეტიც შეიძლება). თვითონ ბენდს რაც შეეხება, ეს კოლექტივი არსად შემომხვედრია, არც კონცერტებზე, არც პაბებში, მაგრამ რეკომენდაცია გაამართლეს, დაუკრეს არადუბლინური და არაბუფალობილური ქავერები (პეროვზე ხომ იცით სადაც არ უნდა შეხვიდე, არა მარტო ერთიდაიგივეს უკრავენ ყველგან, არამედ მგონი სიმღერების თანმიმდევრობასაც არ ცვლიან).

ერთი სიტყვით, ახლა უკვე გადავიდეთ დღევანდელ დღეზე, რომელიც აღსანიშნავია ჯერ მარტო იმით რომ პარასკევი 13-ის წინა დღეა (ვთქვი რა მეც დიდად აღსანიშნავი ფაქტი, უბრალოდ ხვალინდელი დღის მოლოდინი მინდოდა დამეფიქსირებინა. მოლოდინი მოლოდინად და ყველა საიტი რომ თარსობებით გადაიტენება, კარგი თვალყურსადევნებელი იქნება :შავიკატა:).

დღეს საღამოს მორიგი არჩევნის წინაშე ვდგებით:

კვლავ კანუდოსი. ამჯერად არა მარტო ლაივი იქნება 9 საათიდან, არამედ თვითონ ბარის მეპატრონის, ივანე იგივე ვანო იგივე ვანიკოს დაბადების დღეა და იმას ავღნიშნავთ ბუშტებით, შუშუხუნებით, ტორტებით, ფეირვერკებით და ლიმუზინიდან თავამოყოფილი ბიკინებიანი გოგონებით..ხო კარგი ხო, ვიხუმრე. ტორტები და ფეიერვერკები არა და ვიცი მე რაც გაუხარდებოდა კანუდოსში მისულს - ბევრი უფასო ლუდი..და ორიოდ სიტყვა ლაივზე - ხუთშაბათს დრაივის, მაგიდაზე ასვლის და ხტუნვის იმედი არ გქონდეთ. კვლავ ქავერებია, თუმცა წყნარი, დალაგებული, ცოტა ძილისმომგვრელი..ყოველ შემთხვევაში წინა ხუთშაბათს ასე იყო და შესაბამისად დიდად ვერ გავერთე. დღეს იმედია ცოტა გამოცოცხლდებიან.

"დივანში" ამჯერად საქველმოქმედო კონცერტი გაიმართება. იმისთვის რომ ერთ მრავალშვილიან ოჯახს ოდნავ მაინც შეუმსუბუქდეს მდგომარეობა, საჭიროა 9ის ნახევარზე დივანში მისვლა, 5 ლარის გადახდა ბილეთში, შემდეგ ბილეთის იქვე დახევა დემონსტრაციულად და უკან გამოსვლა. ლაინ-აფმა გამახსენა ჩემი თინეიჯერობის წლები, რაც ერთის მხრივ კარგია (ო, ნოსტალჟი), მაგრამ მეორეს მხრივ არაფრად არ ვარგა იმიტომ, რომ მონოპლანს, კეშას (ვოდკა ვ ტრაიომ) და ამორალს (იგივე "წერილი") მგონი ახალი სიმღერები წლებია არ დაუწერიათ და სრულებით არასაინტერესოდ მეჩვენება მათი მოსმენა. + ამას საქველმოქმედო კონცერტს რომ აკეთებ და ასეთ ბენდებს ეძახი მე მგონი არაგამართლებულია იმიტომ რომ 

1 - ხალხი ამაში ფულს არ გადაიხდის, თუნდაც იმ 5 ლარს

2 - ხალხი რომელიც ამაში ფულს გადაიხდის მოიტანს მაქსიმუმ 100 ლარის სარგებელს და 100 ლარი მრავალშვილიან ოჯახს ალბათ ნახევარი დღე თუ ეყოფა.

თუ არასწორ გათვლას ვაკეთებ და რამეში ვცდები, დიდად დამავალებთ თუ კონცერტის შემდეგ შემატყობინებთ.

კაფე-გალერეა დღეს "შავ ძმას" - ლენის დაეთმობა, რომლის ივენთები დიდად არ გამოირჩევა ხალხმრავლობით მიუხედავად იმისა რომ იმაზე უარეს ტრეკებს არ უკრავს ვიდრე სხვა რეზიდენტი დიჯეები. ნუ რას იზამ, სტატუსი თავისას შვება ეტყობა, რეზიდენტი მაინც სხვანაირად ჟღერს, თან როგორც არარეზიდენტს შუა კვირაში და "პა პრაზდნიკამ" ეძახიან ხოლმე (აღდგომას მაგალითად. მეც კარგი მოცლილი ვიყავი რომ მივედი საერთოდ, თუმცა მხოლოს შეხედვით დავკმაყოფილდი იმიტომ რომ ერთი ხელის თითზე ჩამოსათვლელი ხალხი იყო თავმოყრილი).

სამაგიეროდ დიდი "დომხალი" იქნება "სენატში" იმიტომ რომ არამარტო "ისთელები და უესთელები" შეიკრიბებიან (East and West side party ვახსენე ადრე და ამჟამად მეორე ნაწილის დრო დადგა), არამედ იმდენი სპეც-გესთი ყავთ ჩამონათვალში რომ მე მგონი სულ არავინ რომ არ მივიდეს, ჯერ მარტო თვითონ ეყოფიან კლუბს. ენივეი, თუ yo yo, ma nigga მოგენატრათ მიდით და მოუსმინეთ Bad Smile-ს და DJ Alex-ს.

ესეც თქვენი ხუთშაბათი. ხევ ფან

შაბათობა ქალაქში ზურგის, ნიკაკოის და ფეშენ-ფართების თანხლებით

 გადავიტანეთ პარასკევი. შაბათის ჯერი დადგა, რომელიც პარასკევს დიდად არც არაფრით ჩამოუვარდება, ივენთების არჩევანი საკმაოდ მრავალფეროვანია.

ალბათ უკვე გაიგეთ რომ ლუდის მოყვარული საზოგადოება ლუდის ფესტისთვის ვემზადებით, თუმცა იქამდე ჯერ კიდევ ერთი კვირაა და ცალკე პოსტი ეკუთვნის მითუმეტეს თუ კარგად გავიხსენებთ შარშანდელ დებიუტს. ხვალ კი ფესტის მესვეურებმა ეტყობა გადაწყვიტეს კარგად შეგვახსენონ თავი და ამისთვის აირჩიეს ჯგუფი "ზურგი" რომელიც გამართავს აკუსტიკურ ლაივს შარდენზე, სკვერში თუ მის მიმდებარე ტერიტორიაზე. ამ ბოლო დროს ეს ზემოთხსენებული ზურგი იმდენად ყველგანაა, რომ მოსმენის სურვილი დაგეკარგება ადამიანს. არა, კი ვიცი რომ რამდენიმე ფრიად აღფრთოვანებული ფანი ყავთ, მაგრამ რატომ, რისთვის, რა დამსახურებებისთვის, ამას ჯერ-ჯერობით ვერ მივხვდი.

კვლავ ღია ცის ქვეშ, კვლავ "ვიტამინში" ამჯერად ახალი ივენთი იმართება, როგორც ჩანს ხალხს საბოლოოდ უკვე მობეზრდა ოულდ სქული, დაზეპირებულ/გაზუთხული ტექსტების სიმღერა და შესაბამისად ხვალ 9 საათიდან დიჯეი თორნიკე (შარშან ელექტრონავტები რომ მოიგო?) და ვინმე ნინი კვირჭიშვილი დაუკრავენ/იმღერებენ არ-ვიცი-რას. თორნიკეს ვინაობაზე ძალიან დიდი ხანი იყო მითქმა-მოთქმა, მოდი აღარ ჩავუღრმავდები, უბრალოდ ერთი კითხვა მაინც მაქვს: ვინ არის ნინი კვირჭიშვილი?

ყველაფერთან ერთად კუს ტბაზე ყოფილა ესეთი ადგილი - Kiito Sound Beach, სადაც ხვალ ევოილუციური ფეშენ-შმეშენ ფართი გაიმართება. და სავარაუდოდ მოდელების, და ფეშნ შოუების ნაცვლად დაგვხვდება მხოლოდ ფოტოგრაფები, რომლებიც მოდელების მოლოდინში ბევრ ფოტოს გადაუღებენ დამსწრე საზოგადოებას და მერე დალინკავენ (რაც თავისთავად ცუდი არაა). ძალიან ნასიამოვნები ვიქნები, თუ სასიამოვნოდ გამაკვირვებთ, გლამურულად ჩაცმასაც კი არ დავზარდებოდი და ხელოვნურ წამწამებსაც დავიკრავდი ბოლო-ბოლო.

Unique-ში გრძელდება "ჩამოსულთა" თემა და ამჯერად არჩევანი შეჩერებულია Louie Austen-ზე, რომელიც 10 საათიდან ჯაზის, ელექტრონიკის და რეპის ნაზავს შემოგვთავაზებს, ასე რომ ჩემი პროგნოზით საკმაოდ საინტერესო მუსიკალური ღამე გველის.

"დივანში" საღამო ორ ნაწილად გაიყოფა. დღეს ლადო ბურდულის ივენთი იყო, ხვალ კი უკვე ბაკურ ბურდული იმღერებს თავის მელოდიურ სიმღერებს 9-ის ნახევრიდან.

ნიკა მაჩაიძეც ხვალ გამოჩნდება მუსიკალურ ასპარეზზე და წინამორბედებს გაუწევს კონკურენციას. ღამის 11 საათიდან ლაივი დაიწყება "დივანში". ისე თუ დავუკვირდებით ჩვენი თაობისთვის ნიკაკოი ყველასთვის ცნობილი და ფაქტიურად ასევე ყველასთვის საყვარელია, მაგრამ არ არის გამორიცხული მომავალში ის უკვე ცნობილი იყოს როგორც მაქსის მამა, იმიტომ რომ ჩემი აზრით ეს უკანასკნელი საკმარისად ნიჭიერია იმისთვის, რომ სულ მცირე საქართველოში აზრიანად გაიქაჩოს თუ მოინდომა. 

ვგიჟდები ხოლმე -  მიუხედავად იმისა, რომ კაფე-გალერეა კაფე-გალერეაა (you know what I mean), მაინც ყოველ უიქენდზე ყველაზე მეტი დასწრება სწორედ ამ "ზავიძენიის" ივენთებს აქვს. ამ ჯერზე ბერო-სიხას განუმეორებელი ტანდემი მოგველის.

ფეშენზე გამახსენდა და...:

რა-გინდა-სულო-და-გულო პარასკევი

ერთი სული გაქვს როდის მორჩება გამოცდები? უფროსი როდის მოგცემს შვებულებას? როდის გადაყრი საქმეებს, რამდენიმე კვირით ყველაფერ უსიამოვნოს მიივიწყებ და წახვალ სადმე, იქ სადაც არც დილით ადრე იქნები ასადგომი, დღის და ღამის რეჟიმი არეული იქნება, არც თარიღები იქნება მნიშვნელოვანი და არც კვირის დღეები. შემიძლია   თამამად ვთქვა, რომ ჩემი ყოველი ზაფხული სწორედ ასეთია, დღე და ღამე ერთმანეთს ბუნებრივად ებმის და ქმნის ერთ მთლიანობას.

სამწუხარო მხოლოდ ისაა ამ შემთხვევაში, რომ მინიმუმ 4 შაბათ-კვირა კიდევ თბილისში უნდა გავატარო, შენი არ ვიცი და მე დიდად არ ვარ აღფრთოვანებული. 

ასეა თუ ისე, ხვალ მორიგი პარასკევია და შესაბამისად ივენთების სიაც პირდაპირპროპორციულად ვრცელია.

დავიწყებ ცოტაოდენი ლიტერატურით, არა უფრო პოეზიით, თან ეკლექტურით. "დიოგენეში" გიორგი ბუნდოვანთან იქნება შეხვედრა 7 საათზე. ვინაიდან პოეზიით დიდად არ ვინტერესდები, ამიტომ ახლა ვნახე ინტერნეტში ამ პოეტის ლექსები და.. კი, სუბიექტური ვიქნები ამას თუ ვიტყვი, მაგრამ არ ვთვლი რომ რაიმე ახალს ამბობს ეს ადამიანი პოეზიაში..ერთიდაიმავე სიტყვების ტრიალად მეჩვენა, თუმცა ვინ იცის შეიძლება სწორედ ამაში მდგომარეობს თანამედროვე პოეზიის ხიბლი. თქვენ თვითონ შეაფასეთ.

ოუფენ-ეარ ივენთებს განსაკუთრებით ვწყალობ ხოლმე, ამჯერად სრულიად ახალი ლოკაცია აღმოაჩინეს თბილისში როგორც ჩანს - თეთრი ტბა, რომელიც ახმეტელის მეტროდან არის ადვილი მისაგნები, გლდანის პარკთან ახლოს. ივენთი დაიწყება 8 საათზე, ყველაზე საინტერესო ჩემთვის Forestის ლაივი იქნება, კიდევ Stimmhalt იქნება და ორი რეზიდენტი დიჯეი, რომელთა სახელები მგონი პირველად ამოვიკითხე: Garibov & big star. საინტერესოა როგორი "ზვუკი" იქნება დისლოკაციის ადგილას, თუმცა ეს უკვე ადგილზე გაირკვევა.

დიდი ამბებია ე.წ. ვოდკასტვიზიის გარშემო, რომელსაც წლის გალა კონცერტი დაარქვეს - ვინ, რატომ, რა მიზეზით, საიდან გამომდინარე - ეს უცნობია. ასე გამოდის, რომ მეც შემიძლია დავირქვა წლის საუკეთესო ბლოგერი, მაგრამ ეს თვითაღიარებები არ მიყვარს და რას ვიზამ. რომ ვთქვა ლაინ-აფზე გავგიჟდი, არც ეს - Greenbeam & Leonისთვის მივიდოდა ადამიანი. ვერ დავმალავ და ადგილმდებარეობა კი მხიბლავს - ექსპო ჯორჯიას ტერასა.

"დივანი" ტრადიციას არ არღვევს და ორ ივენთს გვთავაზობს, თანაც რადიკალურად განსხვავებულს. 9-ის ნახევრიდან ლადო ბურდულის აკუსტიკური კონცერტი გაიმართება. მახსენდება წლების წინ ლადო როკ კლუბში, ხან ლაივით, ხან აკუსტიკური სიმღერებით. ეს ისეთი მუსიკოსია, რომლის სიმღერებს მე პირადად სახლში არ ვუსმენ, უბრალოდ არ მიჩნდება სურვილი, მაგრამ კონცერტებზე, ლაივში ისეთი "დუხი" მოაქვს, რომ ყოველთვის მინდება დასწრება.
უფრო მოგვიანებით უკვე მაიმუნობები დაიწყება, ოღონდ ამ სიტყვის სრული მნიშვნელობით. გიორგი გიორგანაშვილი აკა ბახალა spanks his monkey. I mean არ ვიცი ეს როგორ მოხდება, ანუ ვერ წარმომიდგენია თვითონ პროცესი, მაგრამ სავარაუდოდ გართობით გავერთობით, მითუმეტეს რომ ლაინ-აფში Zurkin და Ash არიან! გოუ გოუ ბოიზ!

Uniqueში Alma Goldს ელოდებიან და რასაკვირველია ყველა იმიტომ წავა რომ

1)  ქალი დიჯეია
2)  უცხოელია, თან ბერლინიდან ჩამოყავთ რას ლაპარაკობ

მაგრამ აქ ერთი რამ არის გასათვალისწინებელი: იმდენად ერთფეროვანი და მოსაბეზრებელი ტრეკები აქვს რომ კარგით რა. როგორ უნდა იცეკვოთ ამაზე? არამელოდიური ბიტები. ნოუპ, არ ვარგა.

კაფე-გალერიში რეზიდენტი ჟორჟიკა დაუკრავს. (ეს ძალიან მსხვილი წერტილი იყო)

ასეა თუ ისე, წასასვლელი ნამდვილად არის, არჩევანიც მეტ-ნაკლებად, შაბათ-კვირაზე ინფოს ხვალ დავდებ. არა, ხვალ ხომ პარასკევია..კარგი, მაქსიმუმ შაბათს დილით.

ჰევ ფან.

ბულიონის მოლოდინში..ანუ იხილეთ პოსტი

ყოველთვის ვამტკიცებდი რომ ამინდი არ მოქმედებს ჩემს განწყობაზე, არადა თურმე მოქმედებს..განსაკუთრებით მიყვარს მოღუშული და ღრუბლიანი დღეები (შაბათ-კვირის გარდა), ცდუნება ნაკლებია, ჩახუთულობაც.. 

ასეთი დღეების ფონზე, საინტერესო ივენთები გვიახლოვდება თბილისში. მათ შორის დღეს ერთგვარი ბულიონი "Bouillon", რაც ინდივიდუალური პროექტების გამოფენას წარმოადგენს. ვერც პოსტერიდან და ვერც ივენთის აღწერიდან შეუძლებელია დასკვნის გამოტანა თუ რა ტიპის გამოფენა იქნება კონკრეტულად- სურათები, ნახატები, ნახაზები თუ მალევიჩის კვადრატისმგვარები, მაგრამ დაინტერესების მიხედვით ფაქტია რომ რაღაც საინტერესო უნდა მოხდეს 7 საათიდან ყოფილ ევროპის სახლში (თუ არ ვცდები, ბოლო მონაცემებით, ერთი კვირის წინ Q ერქვა, მაგრამ ამ ადგილს იმდენად ხშირად უცვლიან სახელს რომ შეიძლება ბოლო აფდეითს არ ვფლობდე). ერთი სიტყვით ძველ მერიასთან რომ მოხვდებით, ლესელიძის კუთხის მიდამოებში მიმოიხედეთ და სადაც შედარებით მეტ ხალხმრავლობას დაინახავთ, იქ შებრძანდით.

ადრე რამდენჯერმე ვახსენე არტროუდი, ახალი კინო-კლუბი, რომელიც ოთხშაბათობით ავანგარდულ და ექსპერიმენტულ კინოს წარმოგვიდგენს, ამ შემთხვევაში ეს იქნება მან რეის მოკლემეტრაჟიანი კინოების ჩვენება. დაიწყება 8 საათზე და ალბათ საინტერესო დისკუსიებით დასრულდება.

ხუთშაბათ უფრო დიდი არჩევანი გვაქვს. ერთ-ერთ წინა პოსტში ვახსენე და ამჯერად უბრალოდ გაგახსენებთ, რომ კვირას დაგეგმილი "Sunday'z Fiesta Weekend" გადმოტანილია ხვალ 5საათიდან, თუმცა თუ წვიმა ხელისშემშლელ პირობად რჩება, ძალიან დიდ იმედებსაც ნუ დაიტოვებთ, იმიტომ რომ პარასკევამდე მაინც ამინდის პროგნოზი სწორედ "სისველეს" გვპირდება. ლაინ-აფი იგივე რჩება რაც წინათ: Ujin Ray, Vako K, Bero და მსგავსები ანუ მუსიკის მხრივ მისვლა ღირს.

ვისაც კინო-ჩვენება უფრო გაინტერესებთ, ხვალ 8 საათზე უკვე "დიოგენეს" კინო-კლუბში კინოკლასიკას ნახავთ - ვიტორია დე სიკას "სასწაული მილანში". რომ დავუკვირდი იტალიური კინო არ მინახავს თეატრალურ უნივერსიტეტში ჩაბარების შემდეგ და ძალიან მომინდა ჩავუჯდე, მითუმეტეს რომ სახლის პირობებში არც არასდროს ჩავრთავ დარწმუნებული ვარ ან გადახვევებით და პაუზებით უნდა ვუყურო როგორც ყოველთვის, რაც მთელ ხიბლს ფანტავს.

ხვალ ღამე უკვე ამოქმედდება კაფე-გალერეა, სადაც ბაქარუ დაუკრავს. მახსოვს რომ ერთხელ ნამყოფი ვარ მის ივენთზე და მუსიკა ძალიან მომეწონა, ან იქნებ ალკოჰოლმა მომაწონა. უბრალოდ ერთი ვიცი რომ ერთხელ კიდევ უნდა მოვუსმინო და ჩამოვყალიბდე.

აი უიქენდზე ისეთი ამბები ხდება და იმდენი რომ იმაზე ცალკე მოხსენებაა გასაკეთებელი. ხევ ფან!

Tiga გრატოში - დღის მოვლენა

დღეს რა ხდება კი არა, რა ა ღ ა რ ხდება თბილისში. 

გუშინ ვახსენე და ზუსტად ამ ივენთით დავიწყებ კიდეც - TIGA გრატოში (კინოთეატრ "ამირანის" მოპირდაპირე მხარეს). ორგანიზატორები უკვე ერთი თვეა გვაფრთხილებდნენ რომ ბილეთები შეზღუდული რაოდენობით იყიდება (მარკეტინგული ფანდი), რომ სწრაფად უნდა შევიძინოთ, დღეს კი რასაკვირველია აღმოჩნდა რომ ბილეთები არის, ივენთის დაწყებამდეც ადგილზე გაიყიდება უპრობლემოდ, ყველა ბედნიერია, ველოდებით TIGA-ს და დიდი იმედი მაქვს მე პირადად რომ ღამის 4 - 5 - 6 საათზე არ ჩამოფრინდება თბილისში და როგორმე მანამდეც ჩამოაღწევს. და ვინ არის მაინც Tiga? ის ძველ ბიჭებსაც "ევასებათ" (იხ. სიმღერა I wear sunglasses at night) და სიყვარულით გადარეულ, გულგატეხილ  ახალგაზრდებსაც (იხ. You're gonna want me).

Tiga-მდე თურმე ბარ ლაბორატორიუმში შეიძლება შეკრება და დროის გაყვანა. ადრე ამ ბარს პაპრიკა ერქვა თუ გახსოვთ, პურის მოედანზე, პურ-პურთან და რამდენჯერმე დიჯეი ივენთებსაც დავსწრებივარ. მოკლედ, ადგილი კარგია, იმედია ხალხიც იქნება და რამდენიმე shot-საც გადავკრავთ მოწყურებულები.

"დივანი" თავს არ გვავიწყებს და დღეს ალბათ სულ სხვა კატეგორიის მსმენელს შეკრიბავს წინა ივენთებისგან განსხვავებით. 8 საათიდან მისულებს დინი ვირსალაძის და მისი ბენდის მოსმენა შეგეძლებათ. როგორც ვიცი კონცერტი უფასოა, შესაბამისად დაუფიქრებლად შეგიძლიათ გაეშუროთ და ჩაის/ყავის ან თუნდაც ლუდის ფონზე ჯაზით დატკბეთ.
აქვე დარჩენას თუ გადაწყვეტთ, ცოტა მოგვიანებით გაურკვეველი სახის ივენთი იმართება. არაფერი მკითხოთ, არ ვიცი, ვერ შეგპირდებით (if you know what I mean..)

სავარაუდოდ "ვიტამინში" წინა კვირაში გამართულმა old school party-მ გაამართლა. აბა რითი ავხსნათ, რომ დღეს იგივე შემადგენლობა - სალიო კორკოტა და კოსტა კვლავ იმავე დროს, იმავე ადგილას, ისევ ნოსტალგიურ მიქსს შემოგვთავაზებენ? მართალია გრილა, მაგრამ ვიტამინში პლედებიც არის, ასე რომ კუს ტბის ასახვევში, მუზას ტერიტორიაზე გართობა უკვე საღამოს 9 საათიდან შეიძლება.

კაფე-გალერიში ეკალა დაუკრავს 11 საათიდან. ეს იმ შემთხვევაში, თუ არცერთი ზემოთჩამოთვლილი ივენთი არ გიზიდავთ და "პა სტარომუ, პა დობრუმუ" გართობა გინდათ.

შაბათ-კვირაც მეტ-ნაკლებად საინტერესო გველის მგონი. მანამდე კი:

Uploaded with ImageShack.us

get get get naked! ანუ როგორ გავიგრილოთ თავი სიცხეში

 თბილისი. ცხელი და ჩახუთული. აღარ არის. ცოტა გავნიავდით ამ კვირის შუაგულში, თორემ უკვე სასუნთქ ჰაერს ვეღარ ვპოულობდი. მთავარია უიქენდი იყოს თაკარამზიანი, საღამოს სადმე გასვლამდე, გემრიელად ბასეინთან რომ გაირუჯოს მთელიკვირანამუშავები ადამიანი. ეს იქით იყოს და დღეს უკვე შევნიშნე გარკვეული ამოძრავება აქა-იქ.

ყველაზე ადრე "დივანი" გვთავაზობს კარლო კაჭარავას პოეზიის საღამოს, რომელიც 8 საათზე დაიწყება და ეჭვი მაქვს ძალიან საინტერესოდ ჩაივლის. სამწუხაროა რომ მე პოეზია დიდად არ მიზიდავს, თუმცა მიუხედავად ამისა, მაინც დავესწრებოდი პერფორმანსს. მოგვიანებით, კვლავ "დივანში" ჯგუფი "ლეჟავები" გამოვა. არც რაიმე მსმენია ამ ფოლკ ჯგუფზე, არც დამსწრეთა მცირერიცხოვანი სია ახდენს დიდ შთაბეჭდილებას, ასე რომ მოდი ვინც დაესწრებით, თავად გამოხატეთ თქვენი აზრი ამ პოსტის ქვეშ (თუ არ დაიზარებთ).

კიდევ უფრო მეტად გაგრილების მიზნით, გრინჩი კაფე-გალერიში გატიტვლებას გვთავაზობს (ტიტველი რა ცუდი სიტყვაა ისე თუ დაკვირვებიხართ, აი რაღაცნაირი მურტალი). "ფართაობა" შუაღამეზე იწყება ასე რომ თუ ჩემნაირად აპირებთ გერმანია-იტალიის მატჩის ყურებას, დასრულებისთანავე შეგიძლიათ დაიძრათ, თუმცა ფავორიტი გუნდის წაგების შემთხვევაში ეჭვი მაქვს ან ჩაცმა, ან გახდა, ან საერთოდ რამე მომინდეს.

მეორეს მხრივ უფრო დიდი დასწრება აქვს კლუბ სენატის ივენთს - East & West Side party. მოსალოდნელია რომ საღამო გაჯერებული იქნება ბიგის, სნუპის, 2pac-ის და სხვათა დაბერებული ჰიტებით, აი ისეთით, სახლში რომ ასი წელი არ მოუსმენ და კლუბში ამ დროს კივილს რომ იწყებ როგორც კი პირველი ნოტები გესმის. კიდევ ერთი პარადოქსი მინდა აქ ავღნიშნო: 1 საათამდე შესვლა უფასოა, ხოლო პირველის მერე 20 ლარი ღირს. რომელიმე ქართველი იხდის ასეთ ივენთში 20 ლარს? უცხოეთში ვიცი რომ არის ასეთი მიდგომა, მაგრამ აქ? 

ხვალ კიდევ უფრო საინტერესო ივენთებია წინ! მათ შორის ერთი სუპერ-მეგა ივენთი, რომელსაც მე მგონი მთელი თუ არა, ნახევარი თბილისი მაინც ელის. ამაზე უკვე შემდგომ პოსტში.

სუპერმენები, გრინბიმი და ლეონი, სალიო და ბევრი სხვა

შაბათია შაბათი! მზიანი, კაშკაშა, აუზიც მეძახის, მაგრამ სწრაფ-სწრაფად ჩამოვყალიბდენი დღევანდელი დღის (ან უფრო სწორად ღამის) თაობაზე იმიტომ რომ რატომღაც ორგანიზატორებმა ყველაფერი დღევანდელ დღეს დაამთხვიეს და ხვალ მგონი არც არაფერი ხდება.

თუ ფოტომოყვარულები ხართ, ალბათ პირველ რიგში გიორგი ლეონიძის სახელობის ქართული ლიტერატურის მუზეუმში უნდა გაეშუროთ 6 საათისთვის, სადაც ფრანგული ფოტოგრაფიის საუკეთესო ნიმუშებს დაათვალიერებთ.

ცოტა მოგვიანებით უკვე დიდი არჩევანი გვიდგას, რომელიც ჩემთვის თითქმის გადაწყვეტილია, ვინაიდან ისევ "დივანი" არ გვაკლებს სიამოვნებას და ამჯერად Greenbeam & Leon დადგებიან მიქშერთან, თუ 11 საათზე მიხვალთ Kancheli-ს ვორმ-აფსაც დაესწრებით.

ეჭვი მაქვს ძალიან ბევრი ხალხი შეიკრიბება სენატში, რადგან დღეს (მერამდენედ აღარ ვიცი მაგრამ) ჩამოდის Superman Lovers, ჯგუფი რომლის ყველა თუ არა, ერთი სიმღერა (Starlight) მაინც ყველამ იცის და აბა არ-წასვლა როგორ იქნება. ბილეთი საკმაოდ მისაღები ფასი ღირს - 25 ლარი, შესვლა კი 11 საათიდან იწყება. იმდენად ცუდი გამოცდილება გვაქვს საქართველოში ჩამოსულ დიჯეებთან დაკავშირებით, აუცილებლად უნდა გაითვალისწინოთ რომ ივენთის დამთავრების ნაცვლად, 6 საათზე შეიძლება სუპერმენები ჩამოფრინდნენ თბილისში, ასე რომ მოთმინება "მოიმარაგეთ", დაგჭირდებათ.

ღია ცის ქვეშ გასართობად 9 საათიდან "ვიტამინში" შეიძლება წასვლა, სადაც ძველი ბიჭები..არა, ოულდ სქული დაგხვდებათ, ძველი ჰიტები, ბექსთრით ბოიზი, ბოიზოუნი, დაიანა როსი და ეს ყველაფერი სალიო კორკოტას შესრულებით, საღამოს გამიქსავს DJ Ikost, ხოლო დრეს კოდი (რომელსაც არავინ არასდროს იცავს) იქნება წითელი.

დღეს გავიგე რომ რკინის რიგში არსებობს კლუბი Click, სადაც დიჯეი კენზო და ჯარჯი უკრავენ. თემატურად წინა ივენთს ეხმიანება, "ნაფტალინ ფართი" ქვია და სავარაუდოდ ბევრი მივიწყებული მელოდია გაიმიქსება.

და ბოლოსთვის რა მოვიტოვე? 

არა, არ გამომრჩა, რათქმაუნდა, "კაფე-გალერეა". აბო და ბერო. (მე მგონი მეტი კომენტარები აღარაა საჭირო).

wet friday?

გულმოდგინედ გადავათვალიერე უიქენდის ივენთები და მე მგონი მზად ვარ პატარა წვლილი შევიტანო თქვენს არჩევანში ამ კვირას.

პარასკევი (ჩვენი თანთი და ოცნება).

Loudspeakers თავს არ გვავიწყებს და ამჯერად დახურულ სივრცეში გამართავს კონცერტს, კერძოდ კი "დივანში", 9-ის ნახევარზე. ვისაც არ მოგისმენიათ მათი სიმღერები ან ერთი სიმღერა იცით მხოლოდ, აკვიატებული გაქვთ და სხვებს ჯერ ვერ "ჩაუსხედით", გირჩევთ თუნდაც last.fm-ზე ჩართოთ (ახლავე მეთქი!). მე პირადად ყველაზე მეტად ვოკალი მომწონს, ტექსტებიც და მელოდიაც, კარგი შეხამებაა ერთი სიტყვით.

თუ "დივანში" დარჩენა მოისურვეთ, არ იქნება ურიგო იმიტომ რომ თორმეტის ნახევრიდან უკვე სხვა ივენთი იწყება - Lasha Craft და DJ Elenika რუსეთიდან. ელენიკას ტრეკებს საუნდქლაუდზე მოვუსმინე და შეიძლება ითქვას რომ არაა ჩემი ჟანრი (ტექ/ჰაუსი), თუმცა შეიძლება ამ მუსიკის მოყვარულებს ძალიანაც მოეწონოთ.

ცოტა მოგვიანებით უკვე კლუბებში გადანაცვლება შეიძლება. Unique-მაგალითად DJ Linus უკრავს 11 საათიდან. ამ კლუბში ჯერ არ ვყოფილვარ, მაგრამ დღეს საღამოს ბამბის რიგში მოვხვდი და გარედან კლუბსაც შევავლე თვალი. საკმაოდ წარმოსადეგი შენობაა და ისეთია თითქოს რომ გიწვევს თავისთან მაცდურად. მაინტერესებს რამდენად დაემთხვევა მომხიბვლელი ფასადი სიტუაციას რომელიც თვითონ კლუბშია. 

ზოგიერთი კლუბი ორიგინალურ სახელებს არქმევს წვეულებებს და ალბათ ამით ცდილობს თბილისის რეზიდენტების მიზიდვას. ამჯერად სენატმა გადაწყვიტა ამ ხერხს მიმართოს და აკეთებს ივენთს სახელად - Don't Tell Your Boyfriend.. რა ხდება? ნუთუ გოგოებს პარტნიორების ღალატისკენ გვიბიძგებენ? ნუთუ არცერთი გოგო იპოზიორებს ფოტოგრაფების წინ ტუჩებგამობზეკილი და ბოიფრენდებს ჩახუტებულ-ჩაბღაუჭებული? (ხო, ვიცი თქვენი კომენტარი წინამორბედზე: ოჰ, ეს შურიანი! რა ვქნა აბა მე რომ არ მიღებენ ივენთებზე და მრავალასეულიან ფოტოალბომებში არ "მთაგავენ"). ლაინაფზე - Timo Beridze და Misha G. დიდი წარმოდგენა და მოლოდინი არ მაქვს, შესაძლოა იმიტომ რომ არ მომისმენია მათთვის. თუ თქვენ გაქვთ გამოცდილება მათ ივენთებზე ყოფნის, კარგი იქნებოდა ფიდბექი.

აბა რას ვინახავ ბოლოს გემრიელ ლუკმად? 

კი, ეგაა. კაფე - გალერეა რეზიდენტებთან - სიხასთან და კობერტთან ერთად. რაც არ უნდა დიდი დრო გავიდეს, ეს მაინც ის ადგილია სადაც მიდიხარ მაშინ როცა სხვაგან არსად გინდა წასვლა და მაშინაც როცა ბევრი ფიქრი გეზარება ადგილის ასარჩევად, მაშინ როცა ექსპერიმენტების ხასიათზე არ ხარ, მაშინ როცა ნაცნობი გარემო გჭირდება, მაშინ როცა.. ნუ ხო ხვდებით.

შაბათ-კვირას პირველ რიგში გააუზებას გირჩევთ, მზე და სიცხე მე მგონი არ მოგვაკლდება, დანარჩენი კი ხვალ იყოს.

Uploaded with ImageShack.us

პოსტი მათთვის ვისაც პარასკევამდე დროის გაყვანა სურს

იმის გარდა რომ მსოფლიოში ფეხბურთომანია გრძელდება, კვირის განმავლობაში თბილისში ვერაფერი საინტერესო ვერ აღმოვაჩინე. ერთადერთი "კანუდოსში" ხდება რაღაცეები, ნუ ხომ უნდა გავირთოთ თავი შაბათ-კვირამდე.

კერძოდ, ხვალ სამშაბათს იქნება კინო-ჩვენება. არჩევანი გემოვნებიანია, ვერაფერს იტყვი, რობერტ როდრიგესის From Dusk Till Dawn, თან ახალი მთვარე ყოფილა ხვალ და ზუსტადაც რომ თემატურია.

ოთხშაბათს ისევ და ისევ "კანუდოსში" მუსიკის საღამოა, რას და ვის გვთავაზობენ არ ვიცი, მაგრამ ბოლო-ბოლო ლუდი და მეგობრული გარემო ნამდვილად დაგვხვდება მიმსვლელებს.

ხუთშაბათს პინგ-პონგი, კი არა ლუდ-პონგი გაიმართება, ანუ ე.წ. BeerPong. ჩემპიონატში ყველას შეუძლია მონაწილეობის მიღება, მთავარია ხელი გერჩოდეთ, ლუდს სვამდეთ და უბრალოდ გართობის სურვილი გქონდეთ. აი თუ ამის მერე სადმე ახლო-მახლო აქტიური "ტანცი-მანცები" მოგინდებათ, კაფე-გალერიში შეიძლება ტექნოს ფონზე გართობა (ოღონდ ამ დროისთვის დამიჯერეთ ალკოჰოლი საკმაოდ დიდი დოზებით უნდა იყოს შთანთქმული), ჯერ-ჯერობით ვერ "დავტკბი" ვინმე დიჯეი შანშიკას და ნიკალაის დაკრულით, მაგრამ ამბობენ ცუდი არ არისო (არადა მე გამიგია სანამ საკუთარი თვალით არ ნახავ და ყურით არ მოუსმენ, არავის დაუჯეროო).

პარასკევიდან უფრო დატვირთულ რეჟიმში გადავდივართ, მაგრამ ამაზე უკვე ცოტა მოგვიანებით. 

აქვე ხვალინდელი ახალი მთვარის აღსანიშნავად ერთი სისხლიანი მერი ჩემგან

რა ხდებოდა კაფე გალერეაში ანუ ვიტამინის აკუსტიკური ლაივი

სულ ახლახან გრიბოედოვზე კაფე გალერეა გაიხსნა. გახსნა მასშტაბური იყო და პოზიტიური შეფასებები დაიმსახურა, თუმცა სამწუხაროდ მე არა გახსნაზე, არამედ ერთ-ერთ შემდგომ ივენთზე მოვხვდი, კერძოდ ვიტამინის აკუსტიკურ ლაივზე.

მოვხვდი სრულებით შემთხვევით თანაც. მე და ჩემი მეგობარი ჯერ ერთმანეთს შევხვდით, ხუთშაბათი დღე იყო, 23 ივნისი, მე სამსახურიდან გამოვედი, ის ვარჯიშიდან და გადავწყვიტეთ საღამო ერთად გადაგვეგორებინა. ვინაიდან სხვა მეტად საინტერესო არაფერი იგეგმებოდა, ვიტამინზე შევლა გადავწყვიტეთ. ივენთი 8 საათის ნაცვლად, დაახლოებით 9ზე დაიწყო. ჩვენც ამ დროისთვის მივედით და დასასხდომი ადგილი ვერსად ვიპოვეთ, ამიტომ სადღაც ბართან შეგვხვდა ადგილი.

გაბუნიამ ძველი სიმღერები დაუკრა, ზოგიც ქავერი, ხანდახან გობეჯა შეუერთდებოდა ხოლმე, კაფე სავსე იყო და აურაც საკმაოდ სასიამოვნო ტრიალებდა, ანუ მსგავსი გიგებისთვის ადგილი საკმაოდ შესაფერისია. და მაინც, ბოლომდე არ გავჩერდი, ალბათ სადმე რომ მივმჯდარიყავი და ლუდი მეწრუპა უფრო დიდ ხანს ვიქნებოდი.

კაფეში დიჯეი სეტებიც იგეგმება და მგონია, ის უფრო საინტერესოდ მომეჩვენება.